1ª xornada

Partido correspondente á 1ª xornada da Liga Provincial, disputado o sábado 27 de Setembro ás 19:00 no Pavillón Municipal de Ponteceso, disputado entre o Concello de Ponteceso FSF e o Ártabras Fene FSF, con resultado de 2-1 a favor das locais..

A.D. VILA DE PONDAL- CONCELLO DE PONTECESO FSF: Salomé, Carmen, Martina, Elsa e Cintia – tamén xogaron – Zeltia, Noa, Ana.

ÁRTABRAS FENE FSF: Mavi, Claudia Rosa, Andrea, Antia e Cintia - tamén xogaron - María, Carolina e Almudena.

Árbitros: Roberto Martínez Pena (árbitro) e Paula Garrido Brandón (cronometrador), ambos do Comité Técnico de A Coruña.

Amoestaron a Martina, Noa e Elsa por parte local. Expulsaron a Claudia Rosa pola parte visitante.

Goles: 0-1.- Claudia (min 10) 1-1.- Cintia (min 20) 2-1.- Carmen (min 25) Intenso partido o vivido a tarde do sábado no municipal de Ponteceso, que enfrontaba ó equipo local contra o recén formado Ártabras Fene. O partido comezou cos dous equipos esperando atrás, a ver que facía o contrario. Pero co paso dos minutos empezaron a animarse as pontecesanas, intentando chegar á portería rival. A piques estiveron de adiantarse no marcador, pero Martina non chegaba ó segundo pau rematar un bo pase de Cintia despois dunha xogada combinativa con Carmen. Cando parecía que non ían tardar en anotar as locais, chegáronlle uns minutos cheos de fallos que fixeron que as de ferrolterra se viñeran arriba, comezando a levar o peso do encontro. Durante varios minutos foi un acoso continuo das visitantes e, nunha xogada, tras un erro de cobertura das locais, Claudia abría a lata para as visitantes cun tiro que non puido ataxar Salomé. A pesares de recibir o gol, non baixaron os brazos as pondalianas, e volveron a ter o control do xogo e xerar ocasións, como un tiro de Cintia que vai fóra por pouco. Pero no último minuto da primeira metade, Cintia ve á meta rival fóra da área e tira a portería, tiro que interceptou coa man Claudia, provocando un penalti e a súa expulsión. Co tempo xa rematado, era a mesma Cintia a que se encargaba de transformalo, levando ó equipo o vestiario coas táboas no luminoso.

O segundo período comezou coas xogadoras de Barca e Curro moi metidas no partido. Xa nos primeiros minutos se ían achegando á portería visitante e, no minuto 5 e tras unha dobre parede de Carmen e Cintia, Carmen poñía ó Ponteceso por diante no marcador cun remate no segundo pau. A partir de aí o partido estivo cheo de idas e

voltas, cun equipo intentando sentenciar e co outro intentando non perder os puntos. Pero ata os últimos 5 minutos, nos que as de Fene saíron de 5 con Mavi, non chegaron as ocasións máis claras para ambos conxuntos. A boa defensa das pondalianas e a boa resposta da meta Salomé evitaron que as visitantes lle deran a volta ó marcador, sobre todo en 3 xogadas claras de gol que despexaba moi ben Salomé. Pero estas xogadas tiñan resposta das locais, que tamén tiveron oportunidades de sentencia-lo partido, pero Cintia por varias non conseguía que o esférico cruzase a liña de gol. E así chegou o final do encontro, co resultado de 2-1 e coas pontecesanas acadando os 3 primeiros puntos ante a súa afición e dando unha boa imaxe, tanto de xogo como de esforzo.

A próxima fin de semana o equipo pondaliano enfrontarase a un duro rival que nesta primeira fin de semana de competición descansou, será no Pavillón Municipal de Novo Mesoiro o sábado 4 de outubro ás 16.00h ante o Grupo Work.